Чӑваш Ен Ҫӑмӑл атлетика федерацийӗнче ҫӗнӗ ертӳҫӗне суйланӑ. Пӗр вӑхӑтра федерацие Валерий Иванов ертсе пынӑ. Хальхи отчетпа суйлав пухӑвӗнче ҫитес пилӗк ҫула ҫӗнӗ ертӳҫӗне суйланӑ. Федераци председателӗ пулма Шупашкарти 8-мӗш спорт шкулӗн директорӗнче ӗҫлеткен Елена Ивановӑна шаннӑ. Вӑл — Раҫҫейӗн ҫӑмӑл атлетика енӗпе тава тивӗҫлӗ спорт мастерӗ, Олимп вӑййисене икӗ хутчен хутшӑннӑ, тӗнче тата Европӑри марафон чупӑвӗнче чемпионка ята тивӗҫнӗ.
Ҫӑмӑл атлетика федерацийӗ ҫумӗнче кӑҫал пуҫласа йӗркеленӗ попечительсен канашне йӗркеленӗ. Алина Иванова ача-пӑчан ҫӑмӑл атлетикине чӗртсе тӑратас ӗмӗтлине пӗлтернӗ.
Ҫӑмӑл атлетика енӗпе 101-мӗш чемпионат та Шупашкарта иртес шанчӑк пур. Ҫакӑн пирки ҫӑмӑл атлетика енӗпе Раҫҫейӗн пӗрлештернӗ командин тӗп тренерӗ Юрий Борзаковский Шупашкарта пӗлтернӗ.
Аса илтерер, утӑ уйӑхӗн 24-27-мӗшӗсенче Чӑваш Енӗн тӗп хулинче ҫӑмӑл атлетика енӗпе Раҫҫей чемпионачӗ иртрӗ. Утӑ уйӑхӗн 25-мӗшӗнче Пӗтӗм Раҫҫейри ҫӑмӑл атлетика федерацийӗн президиумӗн ларӑвӗ иртнӗ. Унта пӑхса тухнӑ ыйтусен шутӗнче черетлӗ сезонти календарь те пулнӑ.
Чӑваш Енӗн Спорт министерствинче пӗлтернӗ тӑрӑх, 2020 ҫулхи ӑмӑртӑва йышӑнас шанчӑк икӗ хулан пур: Хусанӑн тата Шупашкарӑн.
«Чемпионата ӑҫта ирттерессине президиумӗн кӗрхи ларӑвӗнче татса парӑпӑр, – тенӗ Юрий Борзаковский. – Турнир е Шупашкарта иртӗ, е Хусанта. Хальлӗхе Шупашкар пирки шухӑшлатпӑр».
Шупашкарта турнир кӑҫалхипе ҫиччӗмӗш хут пуҫтарӑннӑ. Унччен Раҫҫей чемпионатне ҫӑмӑл атлетсем Чӑваш Ен тӗп хулине 2002, 2009, 2011, 2012, 2015 тата 2016 ҫулсенче пуҫтарӑннӑ.
Утӑ уйӑхӗн 24-27-мӗшӗсенче Чӑваш Енӗн тӗп хулинче ҫӑмӑл атлетика енӗпе Раҫҫей чемпионачӗ иртет. Ӗнер ӑмӑртӑвӑн иккӗмӗш кунӗ пулчӗ. Чӑваш Енри спортсменсемшӗн вӑл ӑнӑҫлӑ иртнӗ.
Раҫҫейӗн спорт мастерӗ Вера Васильева, тӗрӗссипе, ӑмӑртӑвӑн малтанхи кунӗнчех палӑрнӑ-ха. 800 метрлӑ дистанцире вӑл финала кӗме пултарнӑ. Ӗнер Чӑваш Ен хӗрӗ ҫав дистанцире кӗмӗл медаль ҫӗнсе илнӗ.
Вера Васильева — олимп резервӗн 3-мӗш спорт шкулӗн тата Ардалион Игнатьев ячӗллӗ Спорт хатӗрленӗвӗн центрӗн воспитанници. Пултарулӑха вӑл Раҫҫейӗн тава тивӗҫлӗ тренерӗ Валентина Давалова патӗнче туптать.
Паян Вера Васильева 1500 метра чупӗ.
Шупашкарти чемпионата, сӑмах май, ҫӗршывӑн 72 регионӗнчи спорстменсем килсе ҫитнӗ.
Чӑваш Енӗн тӗп хулинче ҫӑмӑл атлетика енӗпе иртекен Раҫҫей чемпионачӗн иккӗмӗш кунӗ ӗнер хыҫа юлчӗ. Раҫҫейӗн 72 регионӗнчен килсе ҫитнӗ спорстменсем тӑватӑ кунта медальсен 40 комплекчӗшӗн ӑмӑртӗҫ.
Ӗнер, утӑ уйӑхӗн 25-мӗшӗнче, Анжелика Сидорова хӑйӗн унчченхи рекордне ҫӗнетме пултарнӑ. Шӑчӑпа ҫӳллӗшне сикекенскер 4 метр та 86 сантиметра ҫӗннӗ. Ку кӑтартупа вӑл ылтӑн медале ҫӗнсе илнӗ.
Анжелика Сидорова — Европа чемпионки, тӗнчен икӗ хут вице-чемпионки. Раҫҫейри стартсенче Мускавпа Чӑваш Ен чысне хӳтӗлет.
Чӑваш Енӗн Спорт министерствинче пӗлтернӗ тӑрӑх, унчченхи рекорда та спорстменка Шупашкарта тунӑ. 2016 ҫулта иртнӗ Раҫҫей чемпионачӗ вӑхӑтӗнче вӑл 4 метр та 85 сантиметр ҫӳллӗшне сикнӗ.
Раҫҫей чемпионатӗнчи «ылтӑна» Анжелика Сидорова ӗнерхине шута илсен пурӗ тӑватӑ хут ҫӗнсе илнӗ.
Ҫӗртме уйӑхӗн 15-16-мӗшӗсенче Шупашкарта хӑвӑрт утас енӗпе Раҫҫей чемпионачӗ тата первенстви иртӗ. Чӑваш Ене ҫӗршыври 20 регионти 150 ҫӑмӑл атлет килме палӑртнӑ.
Ӑмӑрту Шупашкарти кӳлмекре иртӗ. Арҫынсем – 50 ҫухрӑм, хӗрарӑмсем 20 ҫухрӑм утӗҫ. Юниорсен тупӑшӑвӗ вара «Олимпийский» стадионта иртӗ. Спортсменсем 5 тата 10 ҫухрӑм утса тухӗҫ.
ЧР Спорт министерстви пӗлтернӗ тӑрӑх, кӑҫал наци первенствипе килӗшӳллӗн регионсен хушшинче «Ҫамрӑк скороход» тупӑшу ирттерме палӑртнӑ. Унта 14-15 ҫулсенчи хӗрсемпе каччӑсем хутшӑнӗҫ, пӗрремӗшӗсем – 3 ҫухрӑм, иккӗмӗшӗсем 5 ҫухрӑм парӑнтарӗҫ.
Иртнӗ ҫулта Чӑваш Енри 84 ҫамрӑк «Раҫҫей спорт мастерӗ» ята тивӗҫнӗ. Кун пирки республикӑн Спорт министерстви хыпарлать.
Ҫак йышран сумлӑ ята вун улттӑшӗ иртнӗ ҫул вӗҫӗнче илнӗ, раштаван 29-мӗшӗнче Раҫҫей спорт министрӗ Павел Колобков хушу алӑ пуснӑ. Ҫапла майпа Чӑваш Енри Дарья Александровӑпа Анастасия Ахтямова, Данила Волковпа Михаил Павлов (пауэрлифтинг), Денис Гавриловпа Александр Николаев тата Александр Сорокин (куҫсӑррисен спорчӗ), Александр Даниловпа Ксения Махнева (ҫӑмӑл атлетика), Максим Никоноровпа Татьяна Рогова (спорт гимнастики), Михаил Николаевпа Полина Норкина (ташӑ спорчӗ), Эдуард Тябов (киокусинкай), Артем Микушкин (спорт аэробики) тата Игорь Чеблуков (спорт кӗрешӗвӗ) Раҫҫей спорт мастерӗсем пулса тӑнӑ.
2019 ҫулта Чӑваш Енре вӗренекенсен хушшинче IX ҫуллахи Спартакиада пулӗ. Пирӗн республикӑра финал тупӑшӑвӗ спортӑн ҫичӗ тӗсӗпе иртӗ. Ҫамрӑксем маунтинбайк, ҫӑмӑл атлетика, сӗтелҫи теннис, триатлон, самбо, тхэквандо-ВТФ, шахмат енӗпе ӑмӑртӗҫ.
Палӑртмалла: Пӗтӗм Раҫҫейри ҫуллахи спартакиадӑна 2013 ҫултанпа ирттерме тытӑннӑ, ӑна икӗ ҫулта пӗр хутчен йӗркелеҫҫӗ. Ӑмӑрту спортӑн 42 тӗсӗпе виҫӗ тапхӑрпа иртет. 17-18 ҫулсенчи ҫамрӑксем финала лекес тесе малтан регион тата федераци тапхӑрӗсенче тупӑшаҫҫӗ.
ЧР Спорт министерстви палӑртнӑ тӑрӑх, финала пӗтӗмпе Раҫҫейри 18 пин ытла спортсмен хутшӑнать.
Пӗтӗм Раҫҫейри ҫӑмӑл атлетика федерацийӗн президиумӗ Раҫҫей чемпионатне ӑҫта ирттерессине палӑртнӑ. Ӑна Шупашкарта йӗркеленӗ.
Ҫӑмӑл атлетика енӗпе Раҫҫей чемпионачӗ 100-мӗш хутчен иртӗ. Ӑна ӑҫта ирттерессине халӗ татӑклӑн татса панӑ. Пӗтӗм Раҫҫейри ҫӑмӑл атлетика федерацийӗн президиумӗ икӗ хула хушшинче суйланӑ: Шупашкар тата Хусан.
Чемпионат ҫитес ҫул утӑ уйӑхӗн 24-27-мӗшӗсенче иртӗ. Сӑмах май, иртнӗ эрнере ЧР Элтеперӗ Михаил Игнатьев Чӑваш Енӗн заявкине 90 процент ырланине пӗлтернӗ. Ку ҫитес ҫул Шупашкар 550 ҫулхи юбилейне паллӑ тунипе те ҫыхӑннӑ.
Пӗтӗм Раҫҫейри ҫӑмӑл атлетика федерацийӗн президенчӗ Дмитрий Шляхтин ТАСС информагентствӑна пӗлтернӗ тӑрӑх, ҫитес ҫул Чӑваш Енӗн тата Тутарстанӑн тӗп хулисенче ҫӑмӑл атлетика енӗпе Раҫҫей чемпионачӗ иртме пултарать.
Шляхтин каланӑ тӑрах, ӑмӑрту яланхи пекех утӑ уйӑхӗн 20-мӗшӗсенче иртет. Ҫитес ҫул ӑмӑртун юбилейӗ пулӗ – ӑна 100-мӗш хутчен ирттерӗҫ. Ҫавӑнпа чемпионата ҫӳллӗ шайра йӗркелесшӗн. Ӑна ӑҫта ирттерессине тепӗр уйӑхран палӑртӗҫ. Ун чухне лару пулӗ. Авӑн уйӑхӗн вӗҫӗччен президиум тупӑшӑвӑн календарне хатӗрлӗ.
Палӑртмалла: Шупашкарта Раҫҫей чемпионачӗ 2016 ҫулта иртнӗ, Хусанта – кӑҫал.
Чӑваш Ен спортсменки Анжелика Сидорова ҫӑмӑл атлетика енӗпе иртнӗ Раҫҫей кубокӗнче ылтӑн медаль ҫӗнсе илнӗ.
Ӑмӑрту утӑ уйӑхӗн 11-12-мӗшӗсенче Жуково хулинчи «Метеор» спорткомплексра иртнӗ. Унта Раҫҫейри чи вӑйла спортсменсем тупӑшнӑ.
ЧР Спорт министерствин сайтӗнче хыпарланӑ тӑрӑх, пирӗн Анжелика Сидорова шӑчӑпа 4,65 метр ҫӳллӗшне сикнӗ. Ҫапла майпа вӑл пьедесталӑн ҫӳлти картлашки ҫине хӑпарнӑ.
Анжеликӑн лӑпланса ларма вӑхӑт ҫук. Вӑл халӗ Европа чемпионатне хутшӑнма хатӗрленет. Ӑмӑрту ҫурла уйӑхӗн 7-12-мӗшӗсенче Германири Берлин хулинче иртӗ.
+12.3 °C